19.06.2018
BNP_EaP_CSF

Заява Беларускай нацыянальнай платформы ФГС Усходняга партнёрства ў сувязі з сітуацыяй ў ахоўнай зоне ўрочышча Курапаты

18 чэрвеня 2018 г.

Заява Беларускай нацыянальнай платформы Форума грамадзянскай супольнасці Ўсходняга партнёрства

 У сувязі з сітуацыяй будаўніцтва і дзейнасці рэстаранна-забаўляльнага комплексу ў ахоўнай зоне ўрочышча Курапаты

Мы, прадстаўнікі беларускіх арганізацый грамадзянскай супольнасці, аб’яднаныя ў межах Беларускай нацыянальнай платформы Форума грамадзянскай супольнасці Ўсходняга партнёрства, выражаем глыбокую заклапочанасць сітуацыяй з будаўніцтвам і пачаткам працы рэстаранна-забаўляльнага комплекса “Паедзем-паядзім” побач з гісторыка-культурнай каштоўнасцю “Месца згубы ахвяр палітычных рэпрэсій 30-40 гг. ва ўрочышчы Курапаты”.

У кастрычніку 2012 г. намеснікам Міністра культуры Рэспублікі Беларусь В. І. Курашам было вынесенае прадпісанне аб прыпыненні будаўніцтва кампаніяй “БелРестІнвест» аб’екта прыдарожнага сэрвісу да ўзгаднення з міністэрствам культуры адпаведнай дакументацыі. Адной з прычын прыпынення будаўніцтва стаў той факт, што некаторыя пабудаваныя аб’екты знаходзіліся на тэрыторыі ахоўнай зоны “Курапаты”, межы якой былі ўстаноўленыя пастановай №15 ад 12 траўня 2004 года Міністэрства культуры Рэспублікі Беларусь. У той жа час Генеральная пракуратура ў вынесенным прадпісанні прыйшла да высноваў аб самавольным характары будаўніцтва гэтага аб’екта і даручыла Мінаблвыканкаму і Мінскаму райвыканкаму ліквідаваць дапушчаныя парушэнні, прыцягнуць шэраг службовых асобаў да дысцыплінарнай адказнасці. Тым не менш, у  2014 г. па незразумелай прычыне ў пастанову Міністэрства культуры аб вызначэнні межаў ахоўнай зоны месца масавых пахаванняў ахвяраў палітычных рэпрэсій “Курапаты” былі ўнесеныя змены, якія скарацілі межы ахоўнай зоны  такім чынам, каб у іх не патрапілі будынкі самавольна пабудаванага рэстарана. Такім чынам, асобы, адказныя за парушэнні заканадаўства Рэспублікі Беларусь, не былі прыцягнуты да адказнасці, а незаконны рэстаранна-забаўляльны комплекс атрымаў дазвол на ажыццяўленне дзейнасці.

Урочышча Курапаты мае вялікае сімвалічнае і гістарычнае значэнне для г. Мінска і ўсёй Беларусі як месца памяці ахвяр масавых палітычны рэпрэсій 1937-1940-х гадоў. Курапаты былі месцам расстрэлаў і пахаванняў дзясяткаў тысяч жыхароў Беларусі, рэпрэсаваных органамі НКУС. Факт незаконнага будаўніцтва ў ахоўнай зоне ўрочышча Курапаты выклікаў рэзка негатыўную рэакцыю шырокай грамадскасці г. Мінска і ў цэлым Рэспублікі Беларусь. Грамадскія актывісты, абураныя незаконнасцю і амаральнасцю з’яўлення рэстаранна-забаўляльнага комплекса ў Курапатах, блакуюць яго дзейнасць.

Мы заклікаем адказных асоб з Генеральнай пракуратуры, Міністэрства культуры, Мінгарвыканкама і Мінаблвыканкама прынцыпова паставіцца да ўзнікшай сітуацыі і прыняць адпаведныя дзеянні, у прыватнасці:

  • прыпыніць дзейнасць рэстаранна-забаўляльнага комплекса “Паедзем-паядзім” да высвятлення дадатковых абставінаў законнасці будаўніцтва гэтага аб’екта;
  • правесці пракурорскую праверку законнасці і абаснаванасці ўнясення зменаў у пастанову Міністэрства Культуры Рэспублікі Беларусь ад 12.05.2004 г. № 15 і змянення межаў ахоўнай зоны месцаў масавых пахаванняў ахвяраў палітычных рэпрэсій “Курапаты”, а таксама іншых рашэнняў дзяржаўных органаў аб узгадненні далейшага будаўнітцва рэстарана “Паедзем-паядзім”;
  • адмовіцца ад практыкі прыцягнення да адмініcтратыўнай адказнасці грамадскіх актывістаў, абараняючых ахоўную зону Курапатаў.

 Беларуская нацыянальная платформа ФГС УП

 

Беларуская нацыянальная платформа Форума грамадзянскай супольнасці Ўсходняга партнёрства аб’ядноўвае больш за 70 беларускіх арганізацый грамадзянскай супольнасці.

Спіс арганізацый, падтрымаўшых заяву:

Улад Вялічка, Міжнародны кансорцыюм “ЕўраБеларусь”

Алесь Бяляцкі, Праваабарончы цэнтр “Вясна”

Раіса Міхайлоўская, ПУ “Беларускi дакументацыйны цэнтр”

Алена Танкачова, Вольга Смалянка, Галіна Чарапок, АУ “Цэнтр прававой трансфармацыі”

Юлiя Мiцкевiч,  Арганiзацыя АБФ (Актыўным Быць Файна)

Аксана Шэлест, ГА “Цэнтр сацыяльных інавацый”

Таццяна Рэвяка, Беларускі дом правоў чалавека імя Б.Звозскава

Таццяна Зялко, ГАБП “Наша пакаленне”

Ігар Рынкевіч, ПУ Ліга развіцця дэмакратыі “Грамадзянскі вердыкт”

Андрэй Ягораў, Цэнтр еўрапейскай трансфармацыі

Уладзімір Зуеў, ЭКГА “Неруш”

Сяргей Шаўцоў, Экспертна-прававое таварыства “Ініцыятыва FORB”

Любоў Уладыкоўская, Установа “Міжкультурны дыялог”

Сяргей Антусевіч, Беларускі кангрэс дэмакратычных прафсаюзаў

Юрый Губарэвіч, ПАГА “Рух “За Свабоду”

Дзмітрый Маркушэўскі, Цэнтр даследвання грамадскага кіравання СІМПА

Міраслаў Кобаса, АГА “Фонд ім. Льва Сапегі”

Ігар Леднік, Праваабарончы рух “Наша Беларусь”

Святлана Каралёва, ГА “Беларуская арганізацыя працоўных жанчын”

Вольга Хвоін, ГА “Беларуская асацыяцыя журналістаў”

Уладзімір Карагін, Рэспубліканская канфедэрацыя прадпрымальніцтва

Пётр Кузняцоў, Установа “Цэнтар рэгіянальнага развіцця ГДФ”

Аляксандр Зялко, Установа “Пенсійны выпадак”

Дзмітрый Карпіевіч, Асацыяцыя дадатковай адукацыі і асветы

Саша Кузьміч, Задзіночанне беларускіх студэнтаў

Зміцер Герыловіч, Станіслава Гусакова, БНМС “РАДА”

Крысціна Рыхтэр, Установа “Офіс дапамогі і падтрымкі занятасці моладзі “ЮларКансалт”

Мікалай Кванталіані, “Новая група”

Леанід Скарабагаты, МГА “Добрая воля”

Міхаіл Дарашэвіч, TÜ Baltic Internet Policy Initiative (e-baltic.org)

Алег Волчак, ПЦ “Прававая дапамога насельніцтву”

Аляксандр Каралевіч, ГА “Адукацыйны цэнтар “ПОСТ”

ГА “Экадом”

РПГА “Беларускі Хельсінкскі Камітэт”

ГА “Мінскі сталічны саюз прадпрымальнікаў і працадаўцаў”

Установа “Кансультацыйны цэнтр па актуальных міжнародных практыках і іх імплементацыі ў праве”Human Constanta”

Інстытут развіцця і сацыяльнага рынку для Беларусі і Ўсходняй Еўропы

Мінская абласная арганізацыя абароны правоў спажыўцоў

Клуб шматдзетных бацькоў

ПСУ “Цэнтр дапамогі сем’ям і дзецям”

Моладзевая прафсаюзная група “Студэнцкая Рада”

Заява Беларускай нацыянальнай платформы Форума грамадзянскай супольнасці Ўсходняга партнёрства “У сувязі з сітуацыяй будаўніцтва і дзейнасці рэстаранна-забаўляльнага комплексу ў ахоўнай зоне ўрочышча Курапаты” (спампаваць)