У Менску шукалі мэханізмы ўрэгуляваньня фінансаваньня грамадзкай дзейнасьці

29 сакавіка ў бізнэс-клюбе Imaguru адбыўся сэмінар “Фінансавая ўстойлівасьць арганізацыяў грамадзянскай супольнасьці: міжнародны досьвед і пэрспэктывы для Беларусі”, арганізаваны Міжнародным цэнтрам некамэрцыйнага права, Асамблеяй НДА і Цэнтрам прававой трансфармацыі. Удзел у мерапрыемстве ўзялі больш за 30 прадстаўнікоў беларускіх НКА.  Зь якімі праблемамі сутыкаюцца беларускія некамэрцыйныя арганізацыі ў пытаньнях фінансаваньня дзейнасьці, а таксама якія мэханізмы існуюць дзеля забесьпячэньня фінансавай устойлівасьці НКА?

У часе сэмінару ўдзельнікаў пазнаёмілі зь дзеючым беларускім заканадаўствам, а таксама замежным досьведам забесьпячэньня фінансавай устойлівасьці НКА і з існуючымі мэханізмамі дзяржаўнага фінансаваньня. У часе мерапрыемства абмяркоўваліся магчымыя варыянты ўкараненьня новых мэханізмаў фінансаваньня НКА ў Беларусі, у тым ліку шляхам заканадаўчага замацаваньня розных відаў дзяржаўнай падтрымкі структураў грамадзянскай супольнасьці.

У дакладзе віцэ-прэзыдэнта Міжнароднага цэнтру некамэрцыйнага права Натальлі Барджэлі быў дадзены агляд існуючых у сьвеце мадэляў і мэханізмаў фінансаваньня арганізацыяў грамадзянскай супольнасьці, якія ствараюць разнастайнасьць крыніц паступленьня матэрыяльных сродкаў для структураў грамадзянскай супольнасьці і замацоўваюць іх фінансавую ўстойлівасьць.

Юрыст Асамблеі НДА Юрый Чавусаў прадставіў вынікі дасьледаваньня прынцыпаў і мэханізмаў простага ды ўскоснага дзяржаўнага фінансаваньня НКА, які быў падрыхтаваны Эўрапейскім цэнтрам некамэрцыйнага права па замове беларускіх арганізацыяў.

Прадстаўнік міжнароднага грамадзкага аб’яднаньня “АКТ” Валер Журакоўскі паведаміў пра досьвед лабіраваньня ўвядзеньня ў беларускае заканадаўства мэханізма дзяржаўнай сацыяльнай замовы, а таксама прадставіў агляд бягучай практыкі рэалізацыі гэтага новага мэханізму ў Беларусі. А Натальля Барджэлі ў гэтым тэматычным блёку распавяла пра досьвед Міжнароднага цэнтру некамэрцыйнага права ў галіне прасоўваньня і лабіяваньня пазытыўных заканадаўчых зьменаў у постсавецкіх краінах.

stol1

Экспэрт дабрачыннага “Фонду Тальяцці” Барыс Цырульнікаў падзяліўся досьведам расейскіх арганізацыяў у галіне фандрайзінгу і забесьпячэньня гарманічнага й устойлівага фінансаваньня грамадзкай дзейнасьці праз дывэрсыфікацыю крыніц і практыкаў пошуку матэрыяльнай падтрымкі.

Дырэктарка Цэнтру прававой трансфармацыі Вольга Смалянка прадставіла агляд беларускага заканадаўства і практыкі па пытаньнях гаспадарчай і іншай фінансавай дзейнасьці НКА, у тым ліку пазначыўшы асноўныя праблемы і прававыя перашкоды, зь якімі арганізацыі сутыкаюцца ў гэтай сфэры.

stol

Удзельнікі сэмінару агучылі тыя праблемы ў галіне забесьпячэньня фінансавай устойлівасьці, зь якімі сутыкаюцца іх уласныя арганізацыі. Так, у ліку найбольш істотных прадстаўнікі НКА адзначылі:

скарачэньне ўскоснай дзяржаўнай падтрымкі пры арэндзе памяшканьняў,
складаны парадак  рэгістрацыі праектаў міжнароднай тэхнічнай дапамогі і замежнай тэхнічнай дапамогі (а таксама шэраг іншых аспэктаў гэтай працэдуры, у тым ліку аднясеньне ананімных ахвяраваньняў да замежнай бязвыплатнай дапамогі),
забарона на прадпрымальніцкую дзейнасьць грамадзкіх арганізацыяў без утварэньня асобнай камэрцыйнай юрыдычнай асобы,
абмежавальны характар парадку прадстаўленьня спонсарскай дапамогі ад беларускіх суб’ектаў гаспадараньня і адсутнасьць падатковых ільготаў для ўнутраных ахвярадаўцаў,
— неўрэгуляванасьць дзейнасьці ў галіне сацыяльнага прадпрымальніцтва.

Арганізатары сэмінара спадзяюцца, што вынікі дыскусіі нададуць новы імпульс удзелу некамэрцыйных арганізацыяў у прававых рэформах, накіраваных на зьмяненьне заканадаўства ў мэтах забесьпячэньня ўмоваў для атрыманьня арганізацыямі фінансаваньня з розных крыніц.

Асамблея НДА