Сэмінар пра прававое рэгуляваньне рэгістрацыі і фінансаваньня НКА – 17 верасьня ў Берасьці

Цэнтр прававой трансфармацыі і Асамблея няўрадавых дэмакратычных арганізацыяў запрашаюць на сэмінар “Рэгістрацыя і фінансаваньне некамэрцыйных арганізацыяў: прававое рэгуляваньне«, які адбудзецца ў Берасьці 17 верасьня  (субота).

Да ўдзелу запрашаюцца прадстаўнікі некамерцыйных арганізацыяў ды ініцыятываў з Берасьця і Берасьцейскай вобласьці.

Сэмінар складаецца з двух блокаў, на першы з якіх мы запрашаем прадстаўнікоў незарэгістраваных ініцыятыў, на другі — прадстаўнікоў як незарэгістраваных ініцыятыў, так і зарэгістраваных арганізацый. Удзельнікі могуць прыняць удзел у адным ці ў абодвух блоках.

У першым тэматычным блоку сэмінара будуць разгледжаныя асноўныя арганізацыйна-прававыя формы некамэрцыйных арганізацыяў ды іх адрозьненьні ў прававым статусе і парадку рэгістрацыі згодна з актуальным заканадаўствам. Удзельнікам будзе прадстаўленая інфармацыя адносна парадку ды практыкі рэгістрацыі грамадзкіх аб’яднаньняў, установаў і фондаў, а таксама дадзеныя індывідуальныя кансультацыі ды парады па падрыхтоўцы рэгістрацыйных дакумэнтаў. Удзельнікі сэмінару будуць мець магчымасьць у далейшым скарыстацца кансультацыямі па падрыхтоўцы дакумэнтаў для дзяржаўнай рэгістрацыі НКА.

У другім тэматычным блоку сэмінара будуць разгледжаныя пытаньні прававога рэгуляваньня фінансавых паступленьняў для розных формаў некакмэрцыйных арганізацыяў, у тым ліку: віды фінансавых паступленьняў паводле заканадаўства; прадпрымальніцкая дзейнасьць НКА; афармленьне ахвяраваньняў ад грамадзянаў; бязвыплатная (спонсарская) дапамога ад беларускіх юрыдычных асобаў; атрыманьне замежнага фінансаваньня. Асобная ўвага будзе нададзеная зьменам у прававое рэгуляваньне замежнай бязвыплатнай дапамогі, якія былі ўстаноўленыя Дэкрэтам № 5 “Аб замежнай бязвыплатнай дапамозе”, што набыў моц у сакавіку гэтага года.

Напрыканцы сэмінару ўдзельнікі атрымаюць магчымасьць індывідуальных кансультацыяў па канкрэтных пытаньнях, зьвязаных са стварэньнем новых некамерцыйных арганізацыяў альбо з  прававым забесьпячэньнем фінансаваньня ўжо створаных арганізацыяў.

Удзельнікі сэмінару-кансультацыі атрымаюць асобнік трэцяга выданьня кнігі дырэктаркі Цэнтра прававой трансфармацыі Вольгі Смалянка «Создание некоммерческих организаций в Беларуси: правовые аспекты», а таксама матэрыялы па прававых аспэктах фінансаванй дзейнасьці некамэрцыйных арганізацыяў.

Арганізатары сэмінару будуць радыя вітаць на мерапрыемстве ня больш за аднаго прадстаўніка ад адной арганізацыі. У выпадку, калі колькасьць заявак будзе большая за колькасьць месцаў на семінары, перавага будзе нададзеная ўдзельнікам, заяўкі якіх дэманструюць найбольшую зацікаўленасьць у тэме сэмінару.

Сэмінар-кансультацыя адбудзецца 17 верасьня ў Берасьці, пачатак аб 11:00, працягласьць да сямі гадзінаў. Пра месца правядзеньня і падрабязную праграму працы будзе паведамлена ўдзельнікам сэмінара дадаткова.

Каб падаць заяўку на ўдзел у сэмінары, трэба запоўніць электронную анкету ўдзельніка, якая знаходзіцца па спасылцы: http://bit.ly/2cx7qJW

Апошні тэрмін падачы заявак на ўдзел у сэмінары: 14 верасьня, 12:00.

Пацьверджаньне ўдзелу будзе дасланае ўдзельнікам мерапрыемства не пазьней за наступны дзень, 15 верасьня.